Belofte

Belofte

Op n groot kestail in kontraainen van Den Haag zat kamnet van menisters al uren, wat hait, doagen te vergoadern. Wat mozzen zai dij Grunnegers, dij aalvot rebulie muiken over luddek beetje trillen van eerde, nou nog meer wies moaken? Wat mekaaiert dij domme boeren toch. 

© Free Westerhoff

Gain smerege kolenkaggels meer en hailtied waarmte in haile hoes. Lekker eten koken op nijmoods gasstèl in stee van zo'n rousterge potkaggel en din  zemeln over n scheurtje, ach, muite nait weerd man. Mor, krek dou ze met nkander n zeupke kregen knipperde t Iicht en ston der zo inainen n luddek blaauwkield boertje maank trillend glaswaark op toavel en zee,

 

 'Heurt mie aan, joe hier in t westen  

vanòf nou, naargens meer scheuren 

ik zel joe helpen tot aalderlesten 

mor...houveul geld kin k van joe beuren?' 

 

Doagen, weken, moanden, joa zulfs vief joae laank, luit teuvermaantje  hom nait heuren of zain, mor ...ook eerdbevens wazzen verswonden. Aal menisters stoken nkander n veer in kont. Zai haren boudel haile best veur nkander en schonken heur nog ain in.

Dou inainen ston maantje weer midden op toavel tussen aal knippernde laampkes. 'Beloofd is beloofd,' zee e, 'wat mie touzegd is, zel k kriegen', en stak haand oet. Aallu  wazzen doof en stikkeblind en deden as òf t apmoal Iucht was. t Boerke nam n roam, sprong boven op laandkoart en haauwgde met baaide voesten n groot gat in t westen.
 

'Dou, vannijs klonk Grunnegs laid 
aal glaswaark diggelde van klaid
met n bult geroas borst eerde open
en vot wazzen aal hotemetoten.'


 

Later bericht Overzicht Eerder bericht